Jaman Kepenak

Maca tulisane wong gemblung sing tek kutip kang kene (mangap, diwaca dewek bae lah, ora tegel goleh ngutip), trus maca-maca soal perkembangan jaman sing wis apa-apa Internet aku dadi mandan melu kenthir.

Apa maning lagi nggliyeng tes ora turu sewengi. Bar subuh ngleder nganti nglilir kaget gara-gara ngimpi basah sing temenan gejebur. Gara-gara jendela kelalen ora tek tutup, dadi banyu udan tampuh meng jero kamer.

Sing lagi kepikiran kuwe maraknya biro jodoh liwat internet sing cara kompenine disebut online dating. Kang istilaeh secara harfiah, on kuwe nang, line garis apa jalur, dating mbok sekang kata date, tanggal. Dadi artine dating ndean menanggalkan yah alias udhar-udhar..? Dadi arti sekumplite kira-kira udhar-udhar nang jalur. Mestine ya jalur internet, masa jalur buswae lah... Mbuh nek artine jalur go udhar-udhar, aku ra patia paham lah.

Menungsa-menungsa sing kuper alias kurang perih kaya aku, sing maune ora wani ngerayu wong wadhon bareng nimbrung nang jalur udhar-udhar pancen dadi ketua RW, alias Rai Wadhonan. 3M pokokelah. Mandan Mangas walopun Mrongos. Kang Khamshe bae sing ket mbiyen kayane ngalim, wingi sore wadhul dadi mulai ngalimpe-limpe ketularan aku. Sing maune arep naksir wong wadhon wis kepecirit disit, siki dadi kaya simpati pede. Prinsipe lanang ikih, alaa tetep menang.

Nah, kaitane karo tulisane wong gemblung sing tek omongna mau. Nek kenalan nganti pacaran be bisa liwat internet, kayane sepuluh taun mengarep segalane wis bisa online kabeh. Nglamar bojo ora perlu marani, cukup via email meng calon mertua. Kawin ya ora kudu ngundang pengulu, komprens bae nganggo Yahoo. Mas kawin tinggal nggolet nang webstore, barang wis tekan ngumah.

Rumah tangga ra perlu kembul seumah. Nafkah cukup transfer nganggo internet banking. Nah, soal gathengan... kayane perlu depikir carane. Mbok bae mengarepe bisa ana alat sing bisa ngetokna bocah. Tajin diarah sampel DNAne trus dipetakan, kirim nganggo email. Sing wadon kari mbukak attachment, trus deprint. Rampung...

Kaya wong gemblung pancen. Tapi genah nyatane jaman wis serba instan. Apa-apa ora kudu gawe kaya jaman ora enak mbiyen. Siki butuh santen ora kudu nandhur klapa, ngundhuh, nylumbat, marud nganti meres. Cukup tuku santan powder. Siram banyu wis dadi santen asli. Ana maning milk powder. Bubuk kaya glepung disori wedang wis dadi susu asli.

Mulane wajar aku ngalamun ana rumah tangga online wong jamane wis serba instan. Gawe bocah siki wis ora kudu angel ndadak ugat uget kaya mbiyen. Soale wingi aku mlaku-mlaku nang warunge kajine wis ana produk BABY POWDER.